భవన నిర్మాణదారులకు గుడ్ న్యూస్ ... అవినీతి అధికారులకు బిగ్ షాక్ !

సొంతింటి కల సాకారం చేసుకోవాలని ఆశపడే సామాన్యులకు, నగర పంచాయతీలు, మున్సిపాలిటీలు, నగరపాలక సంస్థలు, పట్టణాభివృద్ధి సంస్థలు (స్ధానిక సంస్ధలు) పరిధిలో భవనాలు నిర్మించే వాళ్లకు ఆంధ్రప్రదేశ్ ప్రభుత్వం ఊరటనిచ్చే కీలక నిర్ణయం తీసుకుంది. భవన నిర్మాణాల తనిఖీలు, ఆక్యుపెన్సీ సర్టిఫికెట్ (ఓసీ) జారీ ప్రక్రియలో ఏళ్ల తరబడి కొనసాగుతున్న జాప్యం, అనవసర అభ్యంతరాలు, అధికారుల వేధింపులకు చెక్ పెట్టేలా ‘త్రీ-టైర్ సిస్టమ’ను అమల్లోకి తీసుకొచ్చింది. ఇకపై భవనాల తనిఖీ, పరిశీలన, ఆమోద ప్రక్రియను లెవెల్-1, లెవెల్-2, లెవెల్-3 అధికారులకు ప్రభుత్వం పరిమితం చేసింది. రాష్ట్రంలోని స్థానిక సంస్థల పరిధిలో నిర్మించే భవన విస్తీర్ణం, కేటగిరీకు అనుగుణంగా ఈ మూడు స్థాయిల అధికారులను నిర్ణయిస్తూ స్పష్టమైన బాధ్యతలను ప్రభుత్వం నిర్ధేశించింది. ఈ మేరకు పురపాలక, పట్టణాభివృద్ధి శాఖ ముఖ్య కార్యదర్శి సురేశ్‌కుమార్ మార్గదర్శకాలు (సర్క్యులర్ మెమో నెం. ఎంఏయుడీ/2026/001/బిఎల్‌డిజి-ఐఎన్ఎస్‌పీ తేది : 1-9-2026) జారీ చేశారు. ప్రభుత్వ తాజా నిర్ణయంతో సామాన్య, మధ్యతరగతి భవన నిర్మాణదారులకు ఏళ్ల తరబడి పట్టిపీడిస్తున్న అవినీతికి అడ్డుకట్ట పడనుంది.

ఇక మూడు మెట్లే ... పై మెట్లకు నో ఎంట్రీ !

ఇప్పటివరకు భవన నిర్మాణాలకు సంబంధించిన తనిఖీలు, ముఖ్యంగా ఓసీ జారీ కోసం దరఖాస్తుదారుల ఫైళ్లు కింది స్థాయి నుంచి పైస్థాయి వరకు పలువురు టౌన్ ప్లానింగ్ అధికారుల టేబుళ్ల చుట్టూ తిరిగేవి. ఈ ప్రక్రియలో ఏర్పడుతున్న జాప్యం, అనవసర అభ్యంతరాలు, అధికారుల విచక్షణారహిత వ్యవహారాలపై ప్రజలు, నిర్మాణదారుల నుంచి ఫిర్యాదులు వెల్లువెత్తుతున్నాయి. దీనికి అడ్డుకట్ట వేయడమే లక్ష్యంగా ప్రభుత్వం ఫైళ్ల కదలికను కుదించింది. ఇకపై లెవెల్-1, లెవెల్-2, లెవెల్-3 పరిధిలోనే తనిఖీ, పరిశీలన, ఆమోద ప్రక్రియ పూర్తికావాలి. నిర్దేశించిన మూడు స్థాయిలను దాటి ఫైళ్లను అనవసరంగా పైస్థాయికి పంపేందుకు వీలు ఉండదు.

లెవెల్-3దే తుది బాధ్యత

కొత్త విధానంలో లెవెల్-3 అధికారి ‘ఫైనల్ కన్ఫర్మింగ్ అథారిటీ’గా వ్యవహరించనున్నారు. దీంతో ఫైల్ ఎక్కడ ఉందనే దానిపై స్పష్టత రావడంతో పాటు, ఏ అధికారి వద్ద ఎంతకాలంగా పెండింగ్‌లో ఉందనే విషయంపై జవాబుదారీతనం పెరగనుంది. ఒక టేబుల్ నుంచి మరో టేబుల్‌కు ఫైళ్లను తిప్పడం, ఉద్దేశపూర్వకంగా జాప్యం చేయడం వంటి విధానాలకు కూడా బ్రేకులు వేసినట్లయింది.

అనవసర అభ్యంతరాలు పెడితే చర్యలే !

ఆమోదిత ప్లాన్‌కు, నిబంధనలకు అనుగుణంగానే నిర్మాణం జరుగుతున్నప్పుడు కొంతమంది స్దానిక సంస్ధల అధికారులు, టౌన్ ప్లానింగ్ అధికారులు అనవసర అభ్యంతరాలు వ్యక్తం చేయరాదని ప్రభుత్వం స్పష్టం చేసింది. చిన్నచిన్న లోపాలను భూతద్దంలో చూపించి నిర్మాణదారులను ఇబ్బందులకు గురిచేయడం, పనులు నిలిచిపోయే పరిస్థితులు సృష్టించడం వంటి చర్యలను తీవ్రంగా పరిగణించనుంది. దరఖాస్తుదారులకు ఆర్థిక నష్టం లేదా మానసిక ఇబ్బందులు కలిగించేలా పనికిమాలిన అభ్యంతరాలు వ్యక్తం చేయరాదని మార్గదర్శకాల్లో ప్రభుత్వం స్పష్టం చేసింది.

లంచం అడిగితే ... ఏసీబీకి !

భవన తనిఖీలు, ఓసీ జారీ పేరుతో లంచాలు డిమాండ్ చేసినా లేదా ప్రభుత్వం నిర్దేశించిన త్రీ-టైర్ విధానాన్ని ఉల్లంఘించినా కఠిన చర్యలు తప్పవని ప్రభుత్వం హెచ్చరించింది. అవసరమైతే అవినీతి నిరోధక శాఖ (ఏసీబీ)కు కేసులను సిఫార్సు చేయడంతో పాటు శాఖాపరమైన క్రమశిక్షణా చర్యలు తీసుకునే అవకాశం ఉంది.

ఏళ్లుగా వేధిస్తున్న ‘ఫైళ్ల ప్రదక్షిణ’కు బ్రేక్ !

రూ. లక్షలు వెచ్చించి భవన నిర్మాణం చేపట్టిన తర్వాత చిన్నచిన్న అభ్యంతరాల కారణంగా పనులు నిలిచిపోతాయనే భయంతో పలువురు నిర్మాణదారులు ఇబ్బందులు ఎదుర్కొంటున్నారన్న ఫిర్యాదులు ఉన్నాయి. కొందరు టౌన్ ప్లానింగ్ అధికారుల డిమాండ్లకు తలొగ్గాల్సి వస్తుండగా మరికొందరు ఏసీబీని ఆశ్రయించి అవినీతి అధికారులను రెడ్‌హ్యాండెడ్‌గా పట్టించిన ఘటనలు కూడా వెలుగుచూశాయి. ఈ నేపథ్యంలో భవనాల తనిఖీలు, ఓసీ జారీ ప్రక్రియను సరళీకరించడం ద్వారా అవినీతిని నియంత్రించడం, అధికారుల జవాబుదారీతనాన్ని పెంచడం, ప్రజా ఫిర్యాదులను తగ్గించడం ప్రభుత్వ ప్రధాన ఉద్దేశంగా కనిపిస్తోంది.

బిల్డర్లకు ఇక రిలీఫ్ !

ఫైల్ ఎక్కడుందో స్పష్టత వస్తుంది, ఫైలుకు ఎవరు బాధ్యత వహించాలి అన్నది తెలుస్తుంది. అనవసర జాప్యానికి చెక్ పడుతుంది. అధికారుల చుట్టూ తిరిగే తిప్పలకు బ్రేక్ పడనుంది. అవినీతి తగ్గుముఖం పడుతుంది. మొత్తంగా టౌన్ ప్లానింగ్ పేరుతో జరిగే వేధింపులకు చెక్ పెట్టడమే ఈ కొత్త విధానం లక్ష్యం. అయితే ... కాగితాలపై తీసుకున్న ఈ నిర్ణయం క్షేత్రస్థాయిలో ఎంత కఠినంగా అమలవుతుంది? అవినీతి అధికారులపై నిజంగానే కొరడా ఝళిపిస్తారా ? అన్నది ఇప్పుడు అసలు ప్రశ్న ! ప్రభుత్వ ఆదేశాలు అమలైతే భవన నిర్మాణదారులకు ఇది నిజంగానే బిగ్ రిలీఫ్ ... అవినీతి అధికారులకు మాత్రం బిగ్ షాక్ !

‘ఈజ్ ఆఫ్ డూయింగ్ బిజినెస’కు బూస్ట్

భవన నిర్మాణ అనుమతులు, తనిఖీలు, ఓసీ జారీ ప్రక్రియను సరళీకరించడం వల్ల సామాన్య, మధ్యతరగతి కుటుంబాల నుంచి భారీ ప్రాజెక్టులు చేపట్టే నిర్మాణదారులకు ఊతమివ్వడంతో పాటు ‘ఈజ్ ఆఫ్ డూయింగ్ బిజినెస్’ను ప్రోత్సహించాలన్నది ప్రభుత్వ లక్ష్యం. ముఖ్యంగా భవనాల తనిఖీల పేరుతో కొనసాగుతున్న దళారీ వ్యవస్థకు, అవినీతి వ్యవహారాలకు ఈ కొత్త విధానం ఎంతమేరకు అడ్డుకట్ట వేస్తుందో వేచి చూడాలి. అయితే క్షేత్రస్థాయిలో ఈ త్రీ-టైర్ విధానం ఎంత సమర్థంగా అమలవుతుంది? అవినీతికి నిజంగా ఎంతమేర అడ్డుకట్ట పడుతుంది? అన్నది వేచిచూడాలి.

జాప్యానికి కారణాలు ఆర్టీఐతో తెలుసుకోవచ్చు

 స్ధానిక సంస్ధల అధికారుల వేధింపులు, తనికీలకు కారాణాలు, ఓసీ జారీలో జాప్యానికి బాధ్యుల వివరాలను ఆర్టీఐ చట్టం ద్వారా తెలుసుకోవచ్చు, అదే విధంగా అధికార యంత్రాంగం సకాలంలో స్పందించనందుకు ప్రజా సమస్యల పరిష్కార వేదిక https://pgrs.ap.gov.in వెబ్‌సైట్‌లో కూడా ఫిర్యాదు చేయవచ్చు.